Bekimi në Sprova

“Para se të pikëllohem endesha sa andej e këndej, por tani ndjek fjalën tënde.” – Psalmi 119:67

“Zoti nuk e lejon dhimbjen tonë të jetë e kotë. Ai e përdor çdo vuajtje për të na forcuar, për të na shenjtëruar dhe për të na afruar më pranë zemrës së Tij.” June hunt

Sprovat janë pjesë e pashmangshme e jetës sonë, por ato kurrë nuk janë të kota në duart e Zotit. Ato na formojnë, na drejtojnë dhe na mësojnë si të ecim më afër Tij. Shpesh, Perëndia i përdor sprovat për të pastruar zemrat tona dhe për të rritur besimin tonë.

1. Sprovat na drejtojnë te Fjala e Zotit
Kur përjetojmë dhimbje, shpesh jemi të detyruar të kthehemi te Zoti për ngushëllim dhe drejtim. Siç thotë Psalmi 119:71: “Ka qenë një e mirë për mua të jem pikëlluar, që kështu të mësoja statutet e tua.” Përmes dhimbjes, ne mësojmë të mbështetemi te e vërteta e përjetshme e Perëndisë.

2. Sprovat prodhojnë urrejtje ndaj mëkatit                                                                                                        

Kur ndjejmë pasojat e mëkatit, shohim sa i dëmshëm është ai për jetën tonë. Bibla na thotë:
“Sepse duke qenë se Krishti ka vuajtur për ne në mish, armatosuni edhe ju me të njëjtin mendim, sepse ai që ka vuajtur në mish pushoi së mëkatuari,”– 1 Pjetrit 4:1
Dhimbja shpirtërore dhe emocionale mund të jetë një mjet që Zoti përdor për të na larguar nga mëkatet tona.

3. Sprovat formojnë një zemër të përulur
Përulësia është një nga virtytet më të çmuara në udhën tonë të krishterë. Apostulli Pjetër na këshillon: “Përuluni, pra, nën dorën e fuqishme të Perëndisë, që ai t’ju lartësojë në kohën e duhur,” – 1 Pjetrit 5:6 Në përulësi, ne mësojmë të presim në besnikërinë e Perëndisë.

4. Sprovat sjellin gëzim të përjetshëm.

Edhe në dhimbje, mund të gjejmë shpresë, sepse e dimë që Zoti ka një qëllim të madh për çdo vështirësi. Psalmi 126:5 na kujton: “Ata që mbjellin me lotë, do të korrin me këngë gëzimi.” Sprovat e tanishme mund të shndërrohen në bekime të ardhshme kur qëndrojmë të lidhur me Zotin.

Reflektim Personal
– Çfarë sprovash po kalon sot?
– Si mund t’i lejosh ato të të afrojnë më pranë Zotit dhe të mësosh nga Fjala e Tij?
– Kujto se Zoti është gjithmonë me ty, duke e kthyer dhimbjen në një histori të shpresës dhe gëzimit.

Sprovat nuk janë të kota. Ato janë mjeti i Perëndisë për të na bërë më të fortë, më të përulur dhe më afër Tij. Në çdo vështirësi, kërko këshillën e Tij dhe qëndro në Fjalën e Tij. Sepse në fund, Ai do të kthejë lotët në gëzim dhe vuajtjet në lavdi.

Mbylle këtë kohë me lutje, duke falënderuar Perëndinë për fuqinë dhe dashurinë e Tij që vepron edhe në sprovat më të mëdha të jetës. Ai po punon për të mirën tënde!

Lutje:

Atë i dashur, në sprova më mëso të mbështetem te Ti. Pastromë, përulma zemrën dhe çel gëzimin Tënd në jetën time. Në çdo gjë që përjetoj, qofsh Ti që më udhëheq dhe më jep forcë. Amen!

Related Posts