Jemi në Javën e Madhe, e njohur edhe si Java e Pasionit, një kohë e shenjtë ku përkujtojmë ngjarjet e jashtëzakonshme që ndodhën para kryqëzimit dhe ringjalljes së Jezus Krishtit. Çdo ditë e kësaj jave mbart një domethënie të thellë shpirtërore, duke na ftuar në reflektim, pendim dhe përkushtim.
Kulmi i kësaj jave është e diela e shenjtë, kur kremtojmë Ringjalljen e Jezus Krishtit – fitoren mbi vdekjen dhe mëkatin. Kisha në mbarë botën bashkohet në këtë festë të madhe, duke shpallur lajmin e gëzueshëm: varri i Jezusit është bosh.
Në Ungjillin sipas Mateut (21:23–27), shohim përballjen e Jezusit me autoritetet fetare, duke zbuluar urtësinë dhe autoritetin e Tij hyjnor:
23 Kur Jezusi hyri në tempull dhe po mësonte, iu afruan krerët e priftërinjve dhe pleqtë e popullit dhe i thanë: “Me ç’autoritet i bën këto gjëra? Dhe kush ta dha këtë autoritet?”
24 Jezusi u përgjigj dhe u tha: “Edhe unë do t’ju bëj një pyetje; nëse më përgjigjeni, edhe unë do t’ju them me ç’autoritet i bëj këto gjëra.
25 Pagëzimi i Gjonit nga vinte? Nga qielli apo nga njerëzit?” Ata arsyetonin midis tyre duke thënë: “Po të themi: ‘Nga qielli’, ai do të na thotë: ‘Përse, pra, nuk i besuat?’
26 Po të themi: ‘Nga njerëzit’, kemi frikë nga populli, sepse të gjithë e mbajnë Gjonin për profet.”
27 Dhe duke iu përgjigjur Jezusit, thanë: “Nuk e dimë.” Atëherë ai u tha: “As unë nuk po ju them me ç’autoritet i bëj këto gjëra.”
Ky fragment na kujton se e vërteta nuk qëndron gjithmonë në autoritetin njerëzor, por në besimin dhe pranimin e së vërtetës hyjnore.
Folës: Pastor Jeton Sokoli
